TIRANE – Partia Demokratike reagoi sot menjëherë pas dekaratave të Edi Ramës në Korçë, duke thënë se kreu i opozitës po sulmon politikat sociale të qeverisë pasi ato janë rrënoja e të ardhmes së tij politike të bazuar në kriza imagjinare.
“Sot përsëri Edvin Kristaq Kriza, me shpifje e trillime të ulta u përpoq ti kundërvihej politikave sociale të qeverisë, rritjes së rrogave dhe pensioneve, rritjes së punësimit, rritjes së investimeve.
Ndërkohë që dje si një fondamentalist i vërtetë sulmoi institutin e statistikave, të dhënat e të cilit kanë marrë vlerësime të jashtëzakonshme nga institucionet më serioze ndërkombëtare si Fondi Monetar Ndërkombëtar, Banka Botërore apo dhe nga institucione të tjera nga e mbarë bota”, tha zëdhënësja e Partisë Demokratike Erla Mëhilli.
Ajo shtoi se “sot në Korcë, Edvin 2 K (Kristaq Kriza) u ngrit sërish kundër investimeve të mëdha të qeverisë në këtë rreth, autostradës Qafë Pllocë – Qukës dhe Boshtit të Jugut, vetëm e vetëm se e di mirë se këto investime rrënojnë të ardhmen e tij politike të bazuar në kriza imagjinare, në shpifje e trillime”.
“Përsa i përket komenteve mbi Ligjin e SHISH, të cilat z.Rama i bën pa e lexuar ligjin, Partia Demokratike qartëson se çdo gërmë, çdo fjalë e çdo fjali rreth këtij ligji është marrë dhe pasqyron standardet më të mira të vendeve të NATO-s dhe BE-së”, tha zëdhënësja.
Zëdhënësja tha se Partia Demokratike e fton Edi Ramën të dërgojë antarët e vetë në Komisionin Parlamentar të Sigurisë ku do të diskutohet ligji, dhe të paraqesë atje të gjitha vërejtjet që ka, por është e sigurt se ska për të pasur asnjë vërejtje. (Lajmifundit)
No comments:
Post a Comment